Nasalakay ang lumang lungga ng mga bakla, pero may bagong magbubukas. Dadalhin namin kayo sa cyberpunk bangketa ng ating “Drag Lord” Manila Luzon, kasama ang kanyang “Drag Dealer” Nicole Cordoves, at “Drag Runner” Sassa Gurl. Sa loob ng walong linggo, sampung Drag Queens ang magpapasiklaban at magapapasa-vogue ng kani-kanilang talas, galing, at ganda para tanghaling susunod na Pinoy Drag Supreme.

Shet! May matatanggal! Gulantang ang mga bakla sa bagong pasabog ni Manila Luzon. Nagsisimula nang mamuo ang tensyon sa pagitan ng mga Drag Queens sa pagpasok ng ikalawang linggo ng kompetisyon. May hiraman ng kasuotang naganap, at hindi inaasahan ang naging reaksyon ng mga bakla rito. Simula na ng drama mga accla, kaya upo na kayo.

Gabi ng lagim sa loob ng Drag Den dahil hindi ganda ang labanan, kundi takutan! Matakot kaya ng mga queens ang guest judge na global drag superstar na si Alaska Thunderfuck sa kanilang interpretasyon ng Pinoy Pamahiin at Horrorscope? Samantala, haharapin na rin ni Margaux ang isang malagim na nakaraan.

Magta-transform ang pitong natitirang queens sa kani-kanilang pantasya bilang anime at alien characters para ma-impress ang Cosplay Icon na si Alodia Gosiengfiao. Sa round na ito, hindi lang sa stage mangyayari ang tagisan ng galing, dahil tuloy ang madramang talakan sa arcade laban sa baby queen.

Back-to-school ang mga queens bilang Miss Intrams at Prom Queen! At nanumbalik din sa kanila ang mga alaala ng kanilang campus life bilang queer students. Sa kabila ng drama, kailangan pa ring galingan para makapasa sa Drag Cartel kasama ang Gen Z queen, Andrea Brillantes.

Tagisan na ng talakan ang labanan ngayong semi-finals. Hindi na sapat ang pabonggahan ng statement swimwear at Power Pinay looks, dahil kailangan na rin nilang ilabas ang talas ng kanilang dila at bilis ng pag-iisip tungkol sa iba’t ibang topics. Mapabilib kaya nila ang cartel at ang “captain”, Golden Globe nominee Dolly de Leon?

Oras na para ma-”undrag” ang series mula sa mga rebelasyon ng main cast at ng creator/director Rod Singh tungkol sa inspirasyon ng show, bagong rules at mga queens. Kakaibang trip din ang hatid ng round na ito dahil sa mga nakakalokang never-before-seen footage mula sa lahat ng sulok ng den.

Ito na ang ang huling pagkakataon para sa natitirang 3 queens para magpasikat ng kanilang beauty, wit at talent sa drag cartel. Samahan sila sa kanilang huling “psyche-den-lic” trip na overdosed sa charm, camp at comedy patungo sa crowning moment ng tatanghaling Drag Supreme.